Market Insight：頁岩氣股翻炒有理

悶市中的焦點，是華潤集團董事長宋林涉嫌違紀違法被調查。一直以來，民企被指良莠不齊，間中都有一兩個計時炸彈被引爆，傷及無辜已經見怪不怪。今次最唔好仲係連央企都畀人管治質素唔好得去邊的壞感覺，仲要係高管以一門五傑，齊齊入成分股作為目標的華潤系。

接觸得央企、國企老總愈多，用公費豪玩豪食絕對唔係新聞，否則就唔會全球最矜貴的布根地DRC，唔會一箱箱運晒嚟香港拍賣，就連費爵爺五月都將倉底的DRC同Petrus運港套現賺人仔，上面班「阿總」要豪，愈矜貴愈難搵愈要擁有。

潤電估值仍屬偏低

最慘仲係華潤系捧場客，一年前先因為天價買山西爛礦醜聞中，逐漸復元氣，昨日又一次畀大孖沙洗倉的藉口，最傷的華潤電力（00836）股價重挫9.6%，成為昨日最差表現藍籌，華潤水泥（01313）跌4.1%、華潤創業（00291）跌4.1%、華潤燃氣（01193）跌2.7%、華潤置地（01109）跌2.9%。

古勝冇點你

萬里長空

相對於去年五月，被指控收購山西金業煤焦化集團資產瀆職，潤電股價由25元邊，洗到落17元至停步。今次爆鑊威力相信無上次咁勁，一來去年爛礦事件，潤電在電力股一直存保持的溢價光環無咗，目前處於相對低的估值，一四年講緊8.7倍市盈率。

展望將來新領導登場，定必同基金經理講將來點樣搞好integrity，信唔信都好，古勝可以肯定，宋林事件唔會係央企第一次，或者最後一次醜聞。不過，壞消息出盡，如果未來幾日見潤電股價逐漸搵到支持企番穩，短期反而可以博反彈。

騰訊債券依然渴市

當然，中資股這類偶然受醜聞影響，引發的跳崖式急跌頻率愈來愈密，投資者定必為中資股加上更大風險溢價，在管治質素真係做到同國際標準睇齊，中資股要爭取較高估值真係唔易。

復活節長假後復市，個市仲未見起色，恒指昨跌29點收報22,730點，成交得482億元，芬佬未放完假返工？抑或佢哋都睇唔通個市？在下比較失望是微博在納市掛牌兩日，升足兩日，以為可以對其他中資網股，包括騰訊（00700）股價沖喜吓，殊不知昨日仲要隊低1蚊散場。

騰訊昨日發行3年及5年期債券，基於標普畀佢A-的高評級關係，指標息率不過2.296厘及3.571厘，據聞發行規模3億至5億美元，點知未到黃昏截飛，食晏時間認購額已經40億美金過外，同股市牛牛皮皮的氣氛有別。債券玩家仲係無限量想向騰訊提供鈔票，為佢同阿里巴巴的天價購物活動，提供低成本融資。

昨日朝早，人行再進行1,000億人仔正回購，繼續收水，點知收市前，決定四月二十五日開始下調縣域農村商業銀行存款準備金率兩個百分點，下調縣域農村合作銀行存款準備金率0.5個百分點，種種動作，印證短期大規模放水的機會唔大。

人行傾向定點、小規模鬆手扶持部分產業，今次目的係金融機構把信貸資源調配到三農領域，為農村發展提供支持。

重組概念仲有得玩

中石化系炒重組概念，全線逆市高收，中石化（00386）及上海石化（00338）同升3%，儀征化纖（01033）升1%。估計中石化為下游業務引入民資的計劃要下半年才有初步方案，即係話重組概念仲有兩三個月炒。中石油（00857）話擬加大投資頁岩氣的消息，提振油服股表現，安東油服（03337）升6%、華油能源（01251）升8%、宏華（00196）升5%、TSC集團（00206）升9%。

論走勢，TSC走勢最強，昨日高位4.63元，乃52周新高，且大陽燭有成交配合。觀去年業績，論盈利增幅，TSC亦同類股中稱冠，可見走勢脫穎而出實有其原因，料股價表現可繼續跑贏同類股。

古勝