孖妹S檔案：缸湖激變4大趨勢

1.焦點轉到暈 高追賺幾格

彩兒：身處魚缸好易令人頭暈，鬼咩，依家啲市場焦點又多又轉得快，咁啱買中當然嗒得杯落，但跟遲少少隨時坐艇，好彩Kitty夠醒目，區區風浪實難你唔到！

Kitty：傻啦，魚缸高手雲集，我要向各位學習就真，上周已走訪魚缸拜會分行經理，順便認識吓「缸湖」新朋友。惟近日大市吹無定向風，今年已輪流炒了科網股、舊經濟股、AH差價股，怎料這些機會一閃即過，來如風、去又如風，依家炒股分分鐘難過登天！

散戶：林生

散戶：Victor

陳：我已經日日收市做功課，但啲主題轉得咁快，我唔敢亂嚟，僅買內銀股求穩陣，年內進帳不多，只可說是守住未蝕。現對優先股亦有興趣，另會留意潛咗水嘅半新股，好似原生態牧業（01431）已跌至僅1.38元，博佢升返招股價2.7元都抵。不過，現時市場冇方向，有不少股友會在十大升幅股內搵機會，見勢追入賺幾格，頂多坐順風車執少少咋。

沈慶洪建議：

受美國加息影響，資金流將有大變化，令市場投資多以短線為主，亦不斷在不同板塊作車輪轉，散戶的確好難跟，就連我哋日日睇住個市都追唔切，完全係莊家玩晒。因此，股民一定要睇基本因素，揀一些回得深、前景佳、估值合理的股份。

2.滬港通借勢 H股賺差價

彩兒：期盼已久的「中港直通車」刺激港股首日表現後，上周二隨即回調三百點，大部分AH股亦有回吐，未免太快玩完啩！

嬌姐：「直通車」消息一出，市場氣氛即刻高漲，個個都驚死蝕底瘋狂掃貨，而我當日追入大折讓H股都有食胡，好彩放得早咋，後來出現大幅調整，好似隻洛陽玻璃（01108）曾回吐逾一成，走遲幾步隨時得個「吉」。不過，我覺得AH股仲有得玩，其差價實在太大啦，好似隻天津創業環保（01065）H股僅4.36元，但A股要8.14元人民幣，大有炒賣空間喎。

沈慶洪建議：

「滬港通」要半年後才實施，依家有不少散戶旨在炒差價收窄，即從套戥概念出發，惟到時有幾多資金來港，將會跟A股定H股價格，全是未知之數，好難判斷，隨時會炒錯股。不如回歸基本面睇盈利能力，例如海螺水泥（00914）雖貴過A股多多聲，但近日已跌過龍，短期應有機會上返32、33元水平，平保（02318）亦一樣，應可重回64、65元水平。

3.細價股狂飆 轉身要夠快

Kitty： 好多散戶鍾意炒股仔，貪其入場金額細，兼有爆升潛力，但風險卻大到嚇死人，如早前中國家居（00692）股價曾直插六成後停牌，真係諗起都一額汗！雖然唔少股民都話怕怕，但我落行時見到大家炒股炒到合合，便好奇邊隻咁受歡迎，原來係中國鐵聯傳媒（00745），呢隻股仔年內大跌78.6%，同樣危機處處。雖然富貴險中尋，結果上周五大升65%，但會否太搏呀？睇嚟股民難做！

林生： 細價股好難玩，通常只集中玩一隻。上周二中國鐵聯傳媒一度跌至0.145元，已較年初高位低逾九成，幾乎跌至渣都冇，再跌空間有限啦。事實上，翌日股價隨即急彈，加上有成交支持，先至追入玩即日鮮賺咗兩成，費事承擔過夜風險，一旦出事就嗚呼哀哉啦！

沈慶洪建議：

要玩細價股，就要「食得鹹魚抵得渴」，根本冇基本因素可言，最緊要轉身夠快，其股價能暴升暴跌，已反映背後有大動作，就好似近日不少細價股遭洗倉，一旦走唔切就冇仇報。

4.科網股熱浪未散 博翻生

彩兒： 雖然科網股不斷回調，熱潮看似減退，但原來有不少人開始撈底，個個都話未死得，極有機會翻生呢！

Victor：在三月尾科網股升得過高後，我已前後四次買入騰訊（00700）put輪賺咗逾十萬，係年內賺得最多的一仗。其實科網股調整得七七八八，我已減持騰訊put輪，但暫時未有轉買call輪的打算，因估計約莫仍會整固多一個月，未來走勢才更健康。然而，由於阿里巴巴集團上市在即，料可利好其概念股，其中中信21世紀（00241）及文化中國傳播（01060）已跌得過低，已入貨博反彈。

沈慶洪建議：

目前計，科網股反而顯得較穩陣，畢竟已大幅回調，值博空間大。當中騰訊為行內龍頭股，競爭對手不多，以每年20%的盈利增長計，近50倍估值雖高但尚算合理，儘管短期仍有沽壓，再大跌空間不大，可買入博升炒一轉。

高妹、彩兒

若有料報畀高妹同彩兒或有嘢問，可電郵money.biz@opg.com.hk