債王格羅斯近年真係行衰運，基金回報低過人、客仔冇鞋挽屐走，最大鑊係親密戰友埃利安毅然離棄，仲踢爆格羅斯係職場沙皇，債王形象大插水，佢可能不甘形象長處谷底，揚言要為自己大平反，好委屈咁話：「我真係咁衰格咩？」
自埃利安話要走冇耐，坊間爆出好多不利債王嘅講法，例如話佢公開鬧爆遲到員工；同事唔記得喺Powerpoint加頁碼又鬧，兼扣年底花紅；有客仔嚟參觀交易室，有員工因冇起身示好，就被罰1萬美元。
債王話自成立Pimco以來生活一直好規律，日日清晨4點半起身，一邊用膝頭控制軚盤開車，一邊食住家樂氏Special K麥米片返公司（咁咪危險駕駛？！），5點半返到公司，第一時間開住7個「芒」（目及）吓隔晚行情。就算以前埃利安坐喺隔籬，大多用Email溝通，因債王唔鍾意做緊嘢被打擾。
債王承認自己內向唔鍾意Social，但拒絕因為咁要Say sorry，相信自己只係與眾不同。佢強調曾經同能夠彌補佢弱點嘅埃利安好老友，不時各自帶埋老婆出嚟食飯。債王話當日對方請辭，佢曾盡力挽留，但未至於跪地求佢咁話。
余絲韻