絲絲講場：網購成癮內地癲絕全球
唔使絲絲點講，大家都知道內地嘅網購發展速度好癲，但究竟有幾多人會日日上網買嘢呢？羅兵咸永道最新個研究話畀大家知，原來七分一嘅內地消費者每日都會網購，每個星期都網購嘅就超過60%，呢啲比例遠遠高過全球添！
羅兵咸勸港商搞O2O
表面睇真係商機無限，羅兵咸永道都話有唔少港商因此北上搵機會，不過當中冇乜幾個搵到肉食，所以佢哋就建議港商要思考吓自己嘅定位，諗吓點樣將實體店同網店連接，亦即係O2O模式，又話呢個係新出路咁喎。
七分一人日日都要買
講返呢個調查，羅兵咸永道係訪問咗全球1.5萬個網購人士，來自15個地區，當中包括900個內地網上消費者，分布一至四線城市。報告結果就指出，七分一內地消費者日日網購，近62%會每周網購，比之前一年上升8個百分點，而且呢個比例跑贏全球嘅21%。
隨住智能手機愈來愈普及，個研究仲發現內地受訪者當中，有約24%話會用智能手機等設備進行網購，每星期一次甚至每日一次，又高過全球平均水平。
余絲韻