Market Insight：盈喜股逢低收集

昨日50隻藍籌中，得3隻唔跌，跌得最勁分別係港交所（00388）及招商局國際（00144），分別跌5.2%及5.5%。除非滬港通好似○七年港股直通車，最後撻Q收場，當然，這個可能性是微乎其微，否則就已知的有限資訊，開放港滬兩邊投資者「雙邊投注」，港交所有着數係唔使問阿貴。不過，睇番滬港通正式宣布前，港交所已經偷步升咗唔少，走得太前，都係嗰句，等佢番到去130至135元先諗。

恒指需重上10日線

唔單止藍籌弱，二三線隊得仲勁，全日得346隻股票向上，見紅的有1,034隻，升跌比例幾乎是一對三，是三月二十七日以來最一面倒。昨日恒指即市低位22,658點，技術上，短線補回上星期三留低22,625至22,721點的上升裂口，但亦係三個半星期以來首次低於10日線（22,731點）收市，今日指數宜升不宜跌，否則確認10日線失守，返落去22,500點樓下再玩泥漿捽角般的上落市機會將會增加。

古勝冇點你 2014/04/16

萬里長空

今日重頭戲係開市半小時後中國的第一季GDP數據。暫時大行預測，是增幅將會由7.7%，進一步滑落至7.3%，低過中央全年7.5%目標。本來數據愈差，人行由中性至輕微水緊的部署愈有放寬空間，至少在上半年將歷史高位的存款準備金率，減番幾個百分點之條件存在。

不過，近排人行班官輪流出嚟話唔會放水，畀市場去槓桿化結束的錯誤訊息，加埋昨日一早人行在公開市場正回購1,720億元人仔，規模比上周同期的630億人仔多出1.73倍。

水泥股「開靚個頭」

收水動作持續，是昨滬綜指向下，連累埋本地中資股捧場客鳥獸散的催化劑，對於股市，估計今日數據最有利係符預期，甚至高於預期，如果出嚟係7.1至7.2%，真係唔知一班對中國股市傾向悲觀的大孖沙會點諗。

TCL通訊（02618）、亞洲水泥（00743）同華潤水泥（01313）發盈喜。TCL通訊預告首季業績對比去年同期轉虧為盈，主要是集團產品轉型策略方向正確，毛利率較高的智能終端產品，佔總銷售比例由去年同期17%升至46%，此外智能手機帶動，首季智能手機出貨量勁升六成至1,360萬部，都係業績好轉的主因。

水泥股是古勝近期心水，亞泥及潤泥盈喜，印證了在下指今年水泥股業績「開靚個頭」的預期。去年上半年水泥股業績處低潮，好似亞泥、潤泥及兩隻龍頭海螺水泥（00914）及中國建材（03323），上半年盈利貢獻僅佔全年業績31%、34%、32%及23%，今年首季水泥價向上，煤價無升，斷估整體業績可接近去年下半年水平。

計估值平到極，可以炒到去咩位，要睇今年保障房外，中央在鐵路及基建投入救經濟的決心有幾大，以股論股，兩隻龍頭現價下跌風險應該唔大。

切忌盲炒AH差價

滬港通引發AH股喪炒差價收窄概念，昨日炒作終於收斂。洛陽玻璃（01108）昨日急跌15%；昆明機床（00300）及京城機電（00187）分別跌8%及7%，第一拖拉機（00038）及東北電氣（00042）同跌逾半成。老實講，呢類H股，股價低迷本來就係因為基本因素欠佳，A股同H股市場投資者結構不同，股份供需及估值取向亦不一樣，純綷因為滬港通而盲目炒作AH差價收窄的投機行為如火中取栗，風險甚高，故重申不建議沾手。

另外，逆市呈強股仔有中國農林低碳（01069），早前成功發債集資，除打算在四川劍閣縣廠增加生產線外，亦計劃在湖南開設廠房，以全力發展生物質能源，昨日走勢偏強升穿近期高位，看官不妨望多兩眼。

古勝