美元弱勢，但歐元表現卻令人不解，炒減息、量寬，甚至周末央行行長德拉吉再一次溫馨提示，指歐元再強就會推出寬鬆措施，但歐元抽高後跌數十點，明顯市場唔係咁Buy。不過，事實上歐元再強，的確進一步打壓歐元區通脹，所以仲未有條件大升，1.395至1.400仍然係歐洲央行底線。
至於今日澳洲央行會公布最近議息會議紀錄，令澳元成為交易機會所在。預期央行繼續維持中性睇法，即係息口已見底，不過究竟央行會唔會擔心樓價不斷飆升同埋澳元持續走強，會係今次焦點。
上次央行行長同副行長被記者問到匯價過高嘅問題時避而不談，當時匯價約係0.92水平，現價水平已慢慢接近筆者心目中的阻力區0.945至0.950。
雖然澳元未係大跌格局，但小注試沽未嘗不可，建議可於0.9450試沽澳元，止蝕於0.9550，首站目標0.932，最終目標0.925。
資深外匯市場人士 陳健豪