絲絲講場：鄭志剛Enjoy睇報紙

新世界發展（00017）執行董事鄭志剛（Adrian）與一班前輩同場，大談新媒體發展，主持話要由老人家講先，Adrian最後生當然排隊尾。佢一揸咪忽然爆咗句：「我年齡上係最後生，但精神年齡可能係最老嗰個。」

原來佢話自己唔用手機或平板電腦睇新聞，主要都係睇報紙，「你唔使睇網上即時新聞，啲朋友喺Whatsapp、facebook已經有最新資訊啦，同埋我Enjoy睇到報紙個排版，知道新聞個重要性。」

Adrian老竇鄭家純（純官）咁啱喺第二個場合講起類似話題。依家網購成行成市，好多傳統零售公司近年都大力發展電商渠道，周大福（01929）就係其中之一。純官話自己冇網購，因為佢唔識，仲話自己連Wechat同埋Whatsapp都唔識用，如果要搵人，直接打電話咪得囉！

純官話Send個訊息畀人，要等人回覆太麻煩，打電話就最快最直接喇！對於現時科網股咁火熱，佢都話因為自己唔熟悉呢樣嘢，唔會做相關投資咁話。

講番周大福嘅發展，純官就話公司上市至今已經兩年幾，當初所作出嘅一啲承諾，依家都已按部就班進行緊，只不過過程中遇到市場同經濟因素而有阻滯。佢仲透露，現時集團擁有超過2,000間店，10年後增加到4,000間都冇問題。

余絲韻