絲絲講場:金融人才紛紛轉「科」

自從○八年金融海嘯之後,銀行界就裁走咗好多人,雖然依家華爾街嘅元氣已經回復得七七八八,但有好多員工仲係放棄金融業,寧願去硅谷轉投科技行業嘅懷抱。

投行1200人變Google員工

金融海嘯一役,捲走好多財富,被裁走嘅人不計其數,留得低嘅員工獎金都大幅減少,但工作時數就一樣咁多,加上行業嘅利潤仲受到新監管規定影響,仲邊有人想入行吖,華爾街唔再係大家心目中最理想嘅工作環境。

絲絲就喺全球最大職業社交網站LinkedIn度見到,喺科技界巨頭谷歌嘅4.75萬員工入面,有1,200人曾經喺全球排名前十位嘅投行入面做過。更加難以置信嘅係,好多頂級嘅投行仲培養咗起碼750個Apple員工、260個雅虎員工同175個Facebook員工。淨係睇呢啲數字,都令絲絲覺得由金融行業跳槽去到科技界嘅人才實在比想像中多。

既然硅谷嘅工作條件咁好,而科技發展又節節上升,絲絲就估,硅谷會唔會變成第二個華爾街呢?

余絲韻