絲絲講場：劉智傑贏錢靠手抄秘笈
滙豐銀行前副總經理劉智傑（劉Sir）退休之後嗜好多多，幾舊水買馬贏170萬蚊通晒天，絲絲早排同佢吹水講開馬，佢話：「唓，好多年前嘅事啦。」其實劉Sir最厲害唔係贏錢咁簡單，而係佢有本「賽馬易筋經」。
自製「賽馬易筋經」
劉Sir由紅褲子出身升做滙豐首位華人副總經理，絕對唔係靠運氣，係靠多年努力。
呢樣嘢同佢買馬真係同出一轍，絲絲同啲馬迷傾過，買馬不外乎睇隻馬神情面貌、騎師同個賠率，但劉Sir比佢哋威，就係從失敗中學習，將多年來嘅買馬經驗，親筆抄低成為一本「賽馬易筋經」，絕對唔差得過少林寺嗰本。
研發軟件增贏面
講起呢本經，劉Sir笑到咔咔聲，佢話：「我自己寫去提醒自己之嘛，其實係一本筆記，去提醒咗我賭馬唔好再犯同一個Mistake，其實賭馬又好，炒股又好，你唔記得你一衝動又會再錯，所以久唔久要睇番吓，唔好重犯，你犯錯少咗已經輸少咗啦。」
令絲絲更「O嘴」嘅係，劉Sir仲搵人研發咗三個賽馬用嘅軟件增加贏馬概率。劉Sir話個軟件係自己用，送畀絲絲都唔識用。劉Sir有易筋經，又有軟件，簡直係現代嘅武俠，絲絲好想拜佢為師。
余絲韻