三星新手機Galaxy S5（GS5）啱啱開賣，香港賣5,550至5,998元，市場反應係點仍要觀察。不過由內地OPPO前管理層劉作虎創辦嘅One Plus，就借機為公司即將推出嘅首款手機「One Plus One」（OPO）造勢，叫網民分享下對OPO低於400美元（約3,120港元）嘅初步定價給予意見。
One Plus同劉作虎係何方神聖，大家可能唔多清楚。但如果提下OPPO呢個同樣係來自內地嘅手機及視聽產品，大家或者會有少少概念。事關劉作虎曾促成全球最大嘅Android第三方作業平台──CyanogenMod（CM）與OPPO合作，推出全球首款以CM為操作平台嘅智能手機。劉作虎舊年自立門戶成立嘅One Plus，外界已覺得佢可能係繼雷軍之後，內地手機進軍國際嘅另一奇兵。
OPO作為劉作虎自立門戶嘅首項產品，將於四月廿三日喺內地正式發布，其官方facebook亦講明產品將會喺奧地利及德國等市場推出，One Plus目前設立英文、德文及法文等官方討論網站，以吸引網民嘅關注。
OPO嘅初步定價雖然低於3,120元，不過其使用嘅高通晶片就與三星GS5看齊，5.5吋屏幕、3GB RAM及電池容量甚至超過GS5，難怪網民睇完介紹都話，部新機有相當嘅吸引力。
余絲韻