萬科喺內地賣樓，一年閒閒地過千億元，依家仲喺哈佛學習緊嘅萬科創始人兼董事長王石，趁住返內地小休，向公司員工灌輸起樓新概念──3D打印機打印一間屋，仲誓言要做全世界最優秀添。
3D打印唔同影印機，呢項技術愈來愈廣泛使用，工業、航空、工程及建築都用到，早排上海都有號稱「全球首批3D打印」嘅房屋。
王石喺公司舉行嘅活動上面就講，萬科下一步要用3D打印機打印一間屋，話要用三年時間，萬科嘅建研中心就會用3D打印機打印出一間屋，仲要集中全世界最優秀嘅資源，喺中國廣闊城鎮化進程入面，做很多以前諗唔到嘅事。
呢類活動每個月都有舉行，每次都會請唔同嘉賓嚟講唔同嘅題目，老友話「其實老闆大多數時間喺哈佛學習，咁啱今次返黎，就由佢負責講。」
絲絲聽講呢次活動喺上海攪，主題係「中國城市30年」，王石講番萬科咁多年嘅發展，提到好多年前萬科起樓所犯過嘅毛病、錯誤，及點樣改正，同時喺外國考察期間，學到點樣尊重傳統同埋歷史。
余絲韻