絲絲講場：天喔搵代言 廠房任睇
歌神張學友近年已甚少亮相，舊年下半年見到佢代言一款炭燒奶茶，後尾絲絲先知，請得郁佢出山嘅，就係舊年九月底上市嘅天喔（01219），絲絲聽董事長林建華講，歌神堅持要親自去工場視察睇清楚，至肯做代言！天王真係一絲不苟，唔係齋睇錢份上！
學友親臨實地視察
天喔喺內地經營零食、飲料，除咗代理，亦有自家品牌。絲絲聽林總講，有另一家公司都想搵學友代言，但因為學友唔了解嗰間公司，所以唔肯貿貿然應承，而天喔舊年搵學友，學友就親自去到天喔嘅廠房視察，最後就成事！真係認真「代言」，唔係揸住product影幾張相咁簡單！
除咗學友，天喔其他產品代言人仲有范冰冰同內地演員文章，呢排掀起嘅韓劇「星星熱」，林總尋日就話搵緊個韓星代言，仲問絲絲點睇，絲絲梗係把握機會sell吓金秀賢啦，不過佢就好口密唔肯講會搵邊個。
林總就透露，嚟緊會首度推出UHT奶，即係一般唔駛雪住嘅常溫奶，仲話係「來佬貨」，由意大利貼牌進口，以天喔旗下品牌銷售。
余絲韻