絲絲講場:財資公會夥港大揀新星

財資市場近年發展更講求行業專業性,財資市場公會(TMA)唔單止推出資歷架構,仲搞埋活動同比賽教育未來新星,近排佢哋同港大合作搞咗個挑戰賽,落場介紹同做評審嘅由金管局助理總裁李達志(Howard)帶隊,粒粒皆星。

比賽鬥估CNH匯率

TMA搞挑戰賽,唔止薪火相傳,仲可以加深學界對離岸人民幣(CNH)市場認識,評判團除咗Howard之外,仲有中銀香港(02388)投資管理部投資主管及總經理陳少平、信銀國際司庫陳鏡沐同澳洲銀行大中華區高級顧問藍玉權,個個都係資深前輩,佢哋要喺15份報告入面揀8份入決賽。

決賽喺四月四日上演,內容要學生估三日後,美元兌離岸人民幣即期匯率定價係幾多,決戰場地係金管局總部,結果贏咗嗰隊估得好貼價,同當日公布6.2140只係差54點子,同一隊仲拎埋最佳演繹及技術分析獎,證明同學仔唔係靠估,近排人民幣咁波動,絲絲都好想睇吓份炒匯報告有咩秘方。

余絲韻