比賽鬥估CNH匯率
TMA搞挑戰賽，唔止薪火相傳，仲可以加深學界對離岸人民幣（CNH）市場認識，評判團除咗Howard之外，仲有中銀香港（02388）投資管理部投資主管及總經理陳少平、信銀國際司庫陳鏡沐同澳洲銀行大中華區高級顧問藍玉權，個個都係資深前輩，佢哋要喺15份報告入面揀8份入決賽。
決賽喺四月四日上演，內容要學生估三日後，美元兌離岸人民幣即期匯率定價係幾多，決戰場地係金管局總部，結果贏咗嗰隊估得好貼價，同當日公布6.2140只係差54點子，同一隊仲拎埋最佳演繹及技術分析獎，證明同學仔唔係靠估，近排人民幣咁波動，絲絲都好想睇吓份炒匯報告有咩秘方。
余絲韻