絲絲講場：人行中銀監唔認有仇

尋日花生友認真過夠癮，英國《金融時報》報道人行同中銀監都唔妥對方，互相杯葛，搞到「金融穩定會議」都一拖再拖。絲絲不時聽聞各地監管方內訌，但正所謂寧畀人知，莫畀人見，人行極速發公告反駁，表示同中銀監「嚴厲譴責」英國《金融時報》不負責嘅行為。

英國《金融時報》話，周小川領頭嘅人行唔滿意中銀監搞唔掂中小行啲問題貸款，又同大行過分熟落，總之就辦事不力。由尚福林話事嘅中銀監就反駁，人行喺雷曼事件後係咁放水，一手造成貸款問題，依家債務危機殺到埋身就要中銀監孭鑊，對佢哋好唔公平。

有位知情人士透露：「周小川可以向最高領導層進言，中銀監對呢點好不高興。」今年66歲嘅周小川係太子黨，過晒退休年齡都仲受國家重用留職，地位唔講都知道有幾堅，可能亦因此惹嚟唔少閒言閒語。

之不過，人行尋日下晝即刻發通告，怒插英國《金融時報》「文章內容與事實嚴重不符，肆意歪曲事實」，仲以「人民銀行和銀監會共同表示嚴厲譴責！」作結，等大家睇睇佢哋幾咁齊心，絕無不和。

余絲韻