近期歐、日弱勢，但商品貨幣澳、紐、加，除咗加紙基本因素稍差外，澳紐元一個炒減息周期完結，一個炒加息，都係近期比較強勢嘅貨幣。其中澳洲唔再減息後，央行仲好似對未來經濟前景幾樂觀，市場開始估澳洲央行可能今年尾到出年首季有機會加息，令澳洲國債孳息率重新上升。
相反，美國就業數據好壞參半，但美國十年期國債孳息反而下跌，而美國近日貿易赤字稍為擴大，加上年初壞天氣將第一季GDP拉低，即係炒加息似乎仍過早，美國債息難以急升。
睇番澳洲同美國國債息差慢慢出現擴闊的現象，有利澳元進一步反彈。投資者宜留意星期四的就業數據，二月份新增職位大升，令市場有驚喜，如果三月份同樣做好的話，絕對可以令澳元進一步挾高，不過0.9450阻力仍然巨大，建議在0.9250買入，跌穿0.92止蝕，目標睇0.94水平。
資深外匯市場人士 陳健豪