絲絲講場：霍建寧人工升到億八
長實（00001）與和黃（00013）年報尋日出咗，絲絲第一時間睇吓，人稱「打工皇帝」嘅和黃董事總經理霍建寧，舊年人工究竟加幾多，佢舊年嘅總薪酬去到1.88億元，加幅4.93%。至於長實及和黃副主席李澤鉅，喺長實、和黃及長建（01038）三家公司實收嘅人工，雖然唔及霍大班，不過計埋都有1.37億元。
李澤鉅實際加薪逾4%
本港上市公司中，年薪過億元嘅管理層雖然唔多，但長和系作為國際企業，加上業績有目共睹，霍大班同李澤鉅嘅薪酬亦唔算好誇張。霍大班去年嘅基本人工其實只係加1.68%至1,085萬元，佔薪酬最大份嘅花紅就按年增加5.21%至1.75億元，計埋袍金同公積金等，成份薪酬就達到1.88億元。
至於李澤鉅喺長實嘅人工連花紅有6,591萬元，但計埋喺和黃及長建嘅收入，舊年嘅薪金實際增加4.26%。
和黃法定名稱加中文
年報仲有其他數字值得大家參考，好似員工數目咁，和黃去年全球聘用嘅員工數目，就由一二年嘅逾25萬增至去年嘅26萬。長實旗下主要業務聘用嘅員工，就由之前一年嘅8,900名減至8,300名，而員工嘅總薪金開支，就由之前一年嘅22.26億元增至去年嘅22.83億元。
長實及和黃股東大會已定咗喺下個月十六日（周五）舉行，印象中好少喺周五。和黃股東會今年嘅其中一個議程，係正式採納「和記黃埔有限公司Hutchison Whampoa Limited」作為公司名稱，原來和黃過去一直都只係以英文名作為公司嘅法定名稱，真係管理層唔講，大家都未必會留意！
余絲韻