Market Insight：醫藥股嚴守止蝕

騰訊開市未幾即跌穿500元大關，全日穿過3次，頭兩次有不少散戶趁低吸納，尾市則由大戶最後兩分鐘夾硬頂上501.5元收市。騰訊就快1拆5眾所周知，「啡底股」意義在於拆細後仍是「紅底股」，所以心理上認為呢個位不能失守。

至於散戶，當騰訊喺兩、三百蚊時大部分唔敢追入，但當由600元跌到500元的時候反而覺得抵買，主要係習慣咗高位之後形成錯覺；所以大戶砌高股價後，不愁無機會派貨。

古勝冇點你2014/04/08

萬里長空

唔單止科網、支付股同生物科技股捱沽，連環保股及濠賭股亦後勁不繼，總之一句「估值過高」就解釋一切。股票市場從來都是風水輪流轉，無非是大戶與散戶之間的鬥智遊戲，大戶炒高某類股份後等散戶接火棒，再收集積弱股伺機派貨。

科網股照計未玩完

早幾年炒過零售股，舊年狂炒細價股，都是人棄我取、人取我棄。不過，科網股相信未有咁快玩完，大戶亦冇咁快完成散貨工程，仍有不少人看好，鄧普頓「光頭博士」就唱反調話開始買科技股，古勝相信騰訊短期會在500元附近玩上落。

舊經濟股如中資電訊、銀行、保險及電力股則繼續翻生，國企指數及紅籌指數昨亦做好。中資股雖然強勢，但由禮拜四開始逐步公布三月及首季內地經濟數據，有可能「愈墮落、愈快樂」，因為經濟數據差代表憧憬中央有機會救市，早前滙豐中國三月PMI差到無倫，但港股不跌反升，現時市場最憧憬的是減存備率，不過人行仍不斷進行正回購，減存備率似有欠邏輯。但遇到投資者「反向思維」，出口弱就救出口，樓市弱就鬆綁，只好信投資格言：有智慧不如趁勢。

雖然市場對經濟數據反應難料，但三月數據的確相當重要，因為頭兩月尚可「賴」農曆新年因素，三月可見真章，尤其出口數據受惠於人仔貶值及美國惡劣天氣消退，理應強勢反彈。

零售股有落鑊藉口

四月股市傳統偏強，然後到「五窮六絕」。新經濟股選擇少，當大量資金追逐有限股份，想唔爆升都幾難。所謂舊經濟股瀚海無邊，要揀都有排揀，兼蟹貨壓頂，買中亦難言大豐收。

睇來睇去，水泥股反而屬穩陣之選，海螺水泥（00914）同華潤水泥（01313）剛破頂，首季業績相比去年基數低甚有保證；上周推介之中建材（03323）今年負債比率有望降到兩倍幾，估值由5倍升到6倍，已代表兩成升幅。

敲冷門可選本地零售股，雖然「五一」黃金周效應大不如前，但總算有藉口落鑊；金飾股六福（00590）預測PE唔夠10倍，未來有機會為三月底年度發盈喜；而莎莎（00178）就快請「都教授」來港宣傳，9蚊調整到6蚊，衰極有個譜。本地零售股今年表現較差的一個原因是有人建議收緊「一簽多行」，但這牽涉到龐大利益，無論放寬或收緊均會面對極大阻力。

國策炒浪開始退潮

大海浪潮漲退有時，魚缸也不例外。近月風電股紛現高台跳水，好似華電福新（00816），股價由本月初高位4.36元，反覆回落至昨日低位3.67元，短短幾個交易日唔見逾15%。金風（02208）由上月高位10.12元回落至昨日低位7.64元。中電新能源（00735）由首季高位0.81元回落至昨低位0.475元，已重返去年底起步水平。

同屬國策股，醫藥股亦唔好得去邊，好似早前熱炒的康哲（00867）、四環（00460）、復星醫藥（02196）及石藥集團（01093）都強勢不再。至於較遲起步的聯邦制藥（03933），上周五見52周高位5.85元後，昨日亦現回吐，收跌4%，短線若失守5.1元，亦宜先行沽出。

所以話，「國策」概念都只係炒作藉口，投機跟進，最緊要識得及時止蝕，套現在手可候低再買番，最不智係做鴕鳥當睇唔到，到頂唔順先在低位斬倉，真係自討苦吃！

古勝