絲絲講場：fb女強人漫畫式生平

大家千祈唔好睇小呢本漫畫，Female Force之前幾期嘅女主角包括咗美國前國務卿希拉妮（Hillary Clinton）、仲有美國第一夫人米歇爾等世界級女強人，個個都係絲絲嘅偶像。睇嚟可以成為Female Force女主角真係好唔簡單。

由求學時代講到成名

漫畫將會係桑德伯格嘅傳記，講述佢背後嘅成功故事，包括屋企背景、讀書生涯、信念，仲有個人同埋工作上嘅成功，應該會帶畀讀者唔少啟發。

話說桑德伯格成日為女性權益發聲。佢曾經出過Lean In一書，為想達成工作目標嘅事業女性提供建議，又為爭取平等社會嘅人作參考。佢仲喺書中提到，一個真正兩性平權嘅社會裏，會係女人負責國家一半嘅事務，而男人則會處理屋企一半嘅工作。果然係女強人嘅思維，絲絲都要拍手掌啊！

不過，今次Female Force呢本漫畫因為篇幅所限，就唔會包括Lean In入面一啲具爭議性又有趣嘅內容喇。作家話如果本漫畫有多八頁，就可以畀讀者知道更多關於桑德伯格嘅思想同佢喺現實生活中實踐信念嘅事迹喇，實在有點可惜。

余絲韻