絲絲講場：國泰特飲比賽鬥調酒
依家飛經香港嘅廉航愈來愈多，對國泰（00293）嘅威脅大大升緊，所以佢哋為咗應戰亦要不斷「升呢」。尋日國泰就搞咗個「調酒」決賽，最後選咗一杯易沖又好飲嘅非酒精特飲出來，遲啲會喺機上供應添。
頭等商務客尊享
原來喺三月份，國泰就喺總部國泰城進行調酒初賽，第一輪有10個城中出名嘅調酒師參加，由超過1,400個空姐空少揀選後，只係剩低5個入決賽。尋日佢哋就施展渾身解數，最後由酒店「奕居」嘅調酒師贏出，佢除咗調酒叻，仲演咗幾下花式調酒，睇到大家拍晒手掌。
絲絲聽講呢款特飲仲要等空姐空少幫手改個名後，最快要下半年先會正式喺機上供應。不過，只係得頭等艙同埋商務艙先有機會飲到。絲絲尋日率先試咗杯特飲，的確係幾清新好飲，唔知遲吓國泰會唔會考慮喺經濟艙都推出其他特飲，咁樣就會更多人開心喇！
余絲韻