債王格羅斯喺佢四月份嘅投資前景報告裏面，發布一個壞消息，債王喺文中一開頭就寫「任何生物都有一個悲慘嘅結局：就係佢哋不久人世。」絲絲見佢咁感觸，仲以為佢講聯儲局加息後，債市就嚟爆煲！原來債王講嘅壞消息其實係佢隻寵物貓女阿Bob已經魂歸天國！
話說債王有隻好有女人味嘅愛貓，見佢咁優雅，就幫佢改咗個名叫阿Bob。阿Bob深得債王歡心，唔止因為佢生得靚咁簡單，仲因為佢做到好多人都唔識嘅嘢，就喺揀股！
債王諗起呢隻星級揀股后時提到：「我成日都會問佢寵物食品股嘅意見，佢時時都會應我，喵一聲就即係『唔好』，喵兩聲就即係『買啦』。雖然佢對息率嘅走勢冇咁熟，但問吓都冇壞嘅。」
又唔好講到債王咁市儈，做Daddy嘅佢愛女心切，睇落佢真係好掛住阿女，聽人講貓有九條命，死咗一條，希望Bob仲有機會同Daddy重逢。「佢對寵物食品股通常有特別睇法，或者佢去咗貓天堂之後會有啲新頓悟。我會喺夢入面問佢，你知啦，有時夢想係會成真嘅！」
余絲韻