絲絲講場：紅杉得米投資大晒冷
有創投基金界「伯樂」稱譽嘅紅杉資本，喺佢哋投資咗逾500間公司中，近半已上市，市值總和高達1.4萬億美元（約10.92萬億港元)，相當於納指總市值嘅22%，認真唔講得笑。最新一期福布斯就請咗紅杉資本掌舵人Doug Leone同基金有投資嘅企業頭頭來個封面大合照，呢個封面價值萬金。
絲絲望望個封面，唔止有WhatsApp創辦人Jan Koum、雅虎創辦人楊致遠，仲有Tesla老細Elon Musk同埋思科主席John Chambers，粒粒都係硅谷嘅巨星。
緊貼科技潮流具慧眼
紅杉資本喺一九七二年由創辦人Don Valentine一手成立，投資歷史至今有42年，雖然基金投資獨具慧眼，但佢同一般創投公司唔同，成功捧紅咗細公司之後，一直都冇高調炫耀。
絲絲覺得最難能可貴嘅係，當全世界仲用緊大型電機嘅年代，佢就發掘咗科網先鋒Apple Inc.，同埋網絡設備公司思科；到互聯網變得普及，佢就投資搜尋軟件雅虎同Google。今年Facebook（fb）收購WhatsApp引起大家關注，但原來早喺一一年，紅杉資本就意識到WhatsApp嘅價值，率先投資。
吸引到咁多實力派嘅創業者申請投資，究竟紅杉資本有咩過人之處呢？PayPal嘅創辦人Elon Musk就記得喺九九年，律師都仲未完成啲法律文件，紅杉資本已經寄咗500萬美元畀佢做起步資金，投資行動真係快到驚人。
余絲韻