絲絲講場：埃利安要出書「解剖」央行
埃利安冇做Pimco舵手，轉咗去Pimco母企安聯做首席經濟顧問之後，好多人都想知多啲佢嘅最新動向。最新消息指埃利安計劃再出書，今次講吓央行崛起同潛在衰落，不過同埃利安不歡而散嘅債王格羅斯，之前聲稱遭對方撰文登報力數不是，絲絲最想反而係埃利安本新書爆多啲二人之間恩怨！
消息話，埃利安今次搵咗版權代理商Wylie Agency搭路，書名叫《The Rise and （Possible） Fall of Central Banks：What It Means for You》，Wylie近日向英、美兩地書商披露嘅新書大綱，內容關於央行多年嚟嘅演變，仲會細數近年啲非常規措施，又會講吓個人、企業以至政府有乜嘢可以做，帶領充滿不明朗嘅經濟環境找出前路方向。
處男作曾攞銷量冠軍
唔好咁快呻悶住，話說埃利安那些年回歸Pimco做行政總裁冇耐，○八年七月發表處男作《大衝撞：全球經濟巨變下的重建預言與投資策略》，嗰陣仲未爆發世紀金融海嘯，已經旋即擸走《紐約時報》暢銷書冠軍寶座。
當然啦，家陣佢同債王鬧得火紅火綠，再做賣書王話咁易，只要本新書係講二人關係嘅興衰，實賣斷市！
余絲韻