絲絲講場：林家亨炒股打波贏晒
有「股壇球癡」之稱嘅恒豐證券研究部董事林家亨（Simon），佢不但炒股叻，早前仲贏咗今年第一場波喇！眾所周知，Simon出咗名鍾意打羽毛球，每個禮拜都會打兩次波，仲要係風雨不改嗰隻，認真神心，難怪佢同Partner加埋成百歲，仲可以鍊贏廿幾歲嘅小伙子啦。
羽球賽鍊贏青年奪冠
Simon今次係同波友一齊參加城市大學舉辦嘅羽毛球比賽，並以男子雙打組合出戰，經過連場激戰，最終奪冠。Simon話：「好彩平時勤有功，個個禮拜都有練波，所以今次都唔使特別為比賽備戰，不過我同隊友加埋嘅年齡都超過100歲，拎亞軍嗰兩位年輕人先得廿幾歲，佢哋體能好好，搞到我成場比賽跑嚟跑去，打到一身汗水，幸好最後都贏咗冠軍，印證有付出一定有回報嘅道理。」
老婆撐場影低英姿
比賽當日Simon嘅靚靚老婆Maggie都有到場支持，仲拎起相機拍下當日戰況，果然係財圈中模範夫妻呀！
Simon同城大都好有緣，據絲絲所知，Simon○七年曾於城大讀EMBA（工商管理碩士），當年佢仲要係拎埋A Grade優異生畢業，好勁呢！
余絲韻