Market Insight：藍籌地產基金補倉

一眾大行對於明晚公布的三月就業數據，信心日益增強，最新估失業率會落番6.6%，新增非農職位，一季以來首次重上20萬個。外圍氣氛唔錯，港股續做好，昨日大市升75點收報22,523點，因為發優先股消息低位反彈唔少的內銀內險開始力弱。

特首指雙辣招樓市調控，收到階段性成果，港人港地隨時變短命政策。地產股成為升市火車頭，恒地（00012）、恒隆地產（00101）、新地（00016）以及長實（00001）升幅介乎3.2至4%。

樓價同歷史高位比較，得幾巴仙回落，但恒生地產分類指數只係得○七年高位40,024點的七成左右，首季恒指跌4.9%，大部分藍籌地產股升得唔多，但已出現跑贏指數迹象，基金經理明知地產股估值平都唔買，全因睇政府有冇撤辣手影，港人港地政策靜靜雞入咗櫃桶底，係咪減辣先兆？睇落唔多似，惟地產股在基金經理組合中underweight得太緊要，季結後無乜故事，短期基金補倉續升都唔奇。

古勝冇點你

萬里長空

內房買殼為借平錢

幾隻內房殼股死貓彈，金地商置（00535）昨升13.7%，綠地香港（00337）升8.8%，萬科海外（01036）升7.2%，招商局置地（00978）升5.6%，可惜股價同去年初高位比較，計落得番35至58%，水瓜打狗唔見一截。

古勝一直搵唔到理由買這類內房殼股，綜觀本地股市，撇除中國海外（00688）以及華潤置地（01109），掛牌內房股一般資產折讓都已經去到四至七成，憧憬母公司以大折讓注資可以益到香港小股民，簡直天方夜譚。真係咁睇好，倒不如直接買內房股好過。

合理推想，如果有好項目，斷估都留番畀上層公司去做，好難益到落去下面的殼股公司，但內地房企係紛紛來港借殼，講到底，同內地收水，尤其房地產及相關企業融資愈來愈困難有關。地產商轉戰香港，藉窗口公司借平錢，即使畀高昂殼價，計落都係除笨有精。

恒天立信料有後着

好似原名東力的招商局置地，舊年十二月發5億美元債，成本只係4.02厘，綠地香港去年底今年初已經發債吸水兩次，成本講緊4.75及5.5厘，要知內房發美元債，閒閒哋8至13厘，同內地銀行借，就算銀行肯借都講緊15厘樓上，所以內地愈水緊，有條件做殼的公司，股價好難落，但已經做咗殼的，都唔知有乜好炒。

冷門股恒天立信（00641）賣枱畀國資委旗下的恒天集團已經好一段時間，昨日終於有動作，公布深圳廠房進行城市更新，將獲10億元人仔的拆遷補償，相當於12.6億港元，減去帳面值之後，預期補償後會有11.7億元帳面利潤之外，仲可以換番重新發展土地上3萬平方米的設施物業，以及額外100個車位，後者究竟值幾多？在下無乜想法。

昨日恒天立信股價急升22.7%，以收市價2.64元計，市值講緊15億元，舊年年底公司淨負債5.7億元，意味如果獲相關當局審批補償，將變成淨現金公司，母公司恒天是全球最大紡織機製造商，估計總資產超過250億人仔，到底會派錢抑或向母公司收購資產，不妨繼續留意發展。

受港交所（00388）相關的利好消息帶動，兩地券商股昨日異軍突起，海通證券（06837）及中信証券（06030）分別升3%及1%，光大控股（00165）升4%、第一上海（00227）及申銀萬國（00218）分別升11%及10%、海通國際（00665）及國泰君安（01788）分別升7%及11%。

炒券商股提防短癮

到底係咪「港股直通車」開通之日有眉目，古勝唔敢作過高期望，畢竟今時唔同往日，各國政府都在收緊水喉，就連一向「豪氣」十足的內地經濟增長速度亦在放緩，而回顧過去幾次炒直通車概念，相關股份升勢都好短癮，故小注投機性跟進宜盡量即日操作，以免誤接火棒！

古勝