根據內地滬深兩市近千家公司一三年年報資料顯示，就行業而言，內地地產業嘅薪酬水平最高，當中有219名高層年薪過百萬元（人民幣‧下同），當中王石、郁亮、任志強三位暫時包攬咗A股高層年薪前三甲。相比之下，曾經創下高層年薪紀錄嘅金融行業，就繼續黯然失色。
雖然舊年受樓市大環境影響，包括地產宏觀調控未有放鬆等，令萬科利潤只係增長兩成，無之前升得咁犀利，不過，就差不多公布晒嘅去年A股年報中，萬科董事會主席王石仍然有望問鼎A股最高薪高層寶座，因為佢舊年稅前年薪再創新高，達到1,590萬元！喺一二年，王石就曾以1,560萬元嘅薪酬登上A股高層薪酬榜榜首位置。
萬科另一位總裁郁亮舊年薪酬合計為1,431萬元，唔單止係A股所有上市公司總裁一職中年薪最高，同時仲超越華遠地產董事長任志強。任志強今年年薪隨住公司淨利潤增長水漲船高，達到1,145.59萬元，這亦是任志強年薪首次過千萬元。
相比起地產，金融公司高層年薪最高就係中國平安董事長馬明哲，薪酬為1,089.96萬元，雖然排第四，但比起○七年嘅酬金6,616萬元，似乎縮水咗一大截，睇嚟金融業作為「打工皇帝」搖籃嘅神話，仍然有一段時間繼續畀地產業嘅風頭蓋過喇。
余絲韻