韓劇《來自星星的你》男主角、近日萌爆嘅「都敏俊教授」金秀賢喺亞洲迅速走紅，唔單止佢自己身價暴漲，仲帶挈埋佢經理人公司Keyeast嘅股價近日急升。係三月上旬，Keyeast嘅股價就曾試過連續四日上漲，升咗近四成。
而據《韓聯社》尋日報道，就連香港科網股王騰訊（00700）都證實要入股Keyeast，雖然暫未有透露入股金額，但消息刺激之下，Keyeast股價昨收市升6.83%。而過去一年呢隻娛樂股已累升1.05倍，最新市值達2,098億韓圜（約15.1億港元）。
Keyeast係南韓嘅娛樂傳媒公司，早年飾演韓劇《冬季戀歌》嘅師奶偶像裴勇俊持有37.5%股份，係最大嘅股東。唔講大家可能唔知，原來呢一間公司唔只培訓新人同搞影視製作，仲有投資埋遊戲開發。上年5月，Keyeast就入股咗一間新成立嘅遊戲開發公司，用3億5千萬韓圜（約252萬港元）買入咗七成股份。
騰訊呢趟入股Keyeast表面上就係睇中金秀賢嘅人氣，唔通想拍埋韓劇，但絲絲睇番騰訊最近嘅搞作，似乎就唔係為咗金秀賢咁簡單啦。因為騰訊無幾耐之前先致公布已經用咗5億美元（約39億港元）買入南韓遊戲開發商CJ GAMES嘅28%股權。出到咁大手筆，家陣又入股Keyeast，擺到明就係想大力發展手機遊戲啦！
余絲韻