絲絲講場：柳傳志中外恩仇曝光
聯想控股董事長兼聯想（00992）榮譽主席柳傳志，二○○九年同聯想主席楊元慶，喺一年之內成功幫聯想扭虧為盈，並且穩步發展為全球個人電腦（PC）一哥，成為IT界成功傳奇。
事隔五年，柳傳志尋日大爆自己同○九年離任嘅聯想老外CEO William Amelio嘅恩怨情仇，並指出對於IT公司，職業管理人嘅短視，隨時會成為害死公司嘅元兇！
柳傳志昨日喺科技大學同學生交流時，就不諱言地承認，聯想管理層當年嘅重組，係由於管理文化衝突造成。
Amelio不服從楊元慶
柳傳志透露，原來早喺○五、○六年佢接手IBM嘅PC業務之際，佢同楊元慶早已認定，聯想大力開拓針對消費者嘅PC市場，以減低對企業用戶嘅倚賴。
只可惜當時聯想外籍CEO Amelio就拒絕接受呢套發展策略，甚至喺董事會上拉攏外資基金代表反對楊元慶嘅主張，而柳傳志當年係喺楊元慶力邀下，先決定重掌聯想董事局，同楊元慶全力開展管理改革，為聯想嘅發展打下基礎。
時至今日，柳傳志已退出聯想董事會，但佢仍然關心聯想喺流動互聯網面對嘅挑戰，並話聯想目前嘅兩大方向，係力拓手機同平板電腦嘅硬件；同埋將應用同軟件服務連結。
聯控仍會獨立上市
柳傳志並再次明言聯控係有獨立上市嘅打算，但現時卻以「不好說」來回應。絲絲記得聯控過去曾透露，希望喺一四至一六年整體上市。柳傳志尋日咁口密，唔知道係咪暗示上市大計，已經進入敏感時刻呢？
余絲韻