蒙牛（02319）意外染藍後出第一份業績，並無令市場失望，就算扣咗雅士利（01230）嘅貢獻，份業績都好省鏡，尋日總裁孫伊萍梗係滔滔不絕咁講咗成個鐘。不過為咗唔令全場「釣魚」，佢個Present計過度過，最令絲絲醒神嘅就係話蒙牛今年嘅關鍵字係IPO！吓？
絲絲同成班行家第一個反應係分拆？第二上市？No no no！孫總一向都好識Present，甚有大將之風，佢仲知道香港市場大家都對IPO好敏感，所以尋日度咗條橋，用呢3個英文字令大家無瞓着。當然全場即刻醒晒啦，話晒近排新股市場乃大眾焦點，而蒙牛做咗國家隊後又動作多多，莫非佢染監後又有咩大計？
孫總就慢慢解畫話，今年蒙牛嘅關鍵策略就係IPO：Innovation（創新）、Integration（整合）；Performance（表現）和Open & Transparency（公開及透明），明晒！
簡單啲講就係營銷、產品都創新；整合兩大外國品牌合作夥伴達能同埋Arla Foods，以及雅士利，提升效率表現，仲提倡企業陽光氣息嘅文化喎。其實孫總上場未夠兩年，已經將蒙牛搞得好好睇睇，算係巾幗不讓鬚眉o架喇！
余絲韻