究竟成功要付出幾多代價？瞓覺時間可能係基本，因為現時國際知名IT巨企嘅大佬個個都唔使瞓咁滯，並且天朦光就返工，好似機械人咁！
創立騰訊（00700）帝國嘅馬化騰，喺改變幾億人生活方式同時，亦犧牲咗自己嘅瞓覺時間。原來以前佢成日凌晨12點都唔收工，總會搵到好多問題畀相關負責人，同事們就只好陪住佢一齊解決問題直到深夜。
連佢嘅父母都經常受影響，馬化騰嘅母親黃惠卿曾經話:「孩子愈成功父母愈辛苦」，為照顧馬化騰嘅生活所需好操勞。好似有一趟，馬化騰父親等個仔收工，等到喺梳化瞓着咗，可能唔記得冚被，結果搞到重感冒添！
另外蘋果新教主庫克嘅作息時間，都證明咗佢係「世界上最具價值嘅科企CEO」。皆因佢每朝3點45分起身，一直工作到深夜。每日都係第一個返工，最後一個走。
Facebook CEO朱克伯格都唔輸蝕。佢講過：「其他人瞓覺，我仲捱緊夜，其他人放工，我仲做緊嘢；對我嚟講，捱夜捱到早上6至8點完全唔奇怪！」聽聞當年微軟曾經向朱仔拋出一份年薪95萬美元嘅工作，但因為佢不能準時起身，所以無喺朝早八點同微軟高層會面而無咗份工。
絲絲諗，「搏到盡遲瞓兼早起」應該係以上幾位IT巨企大佬嘅人生座右銘之一，不過搏還搏，都要好好保重身體，始終健康都係無價寶嘛。
余絲韻