絲絲講場：方丈見庫克交流WiFi經

原來佛學，尤其係禪宗，早已經喺美國加州同硅谷扎根多年。追溯番禪宗喺美國嘅歷史，一九六二年日本曹洞宗禪師鈴木俊隆喺三藩市創立咗第一間西方禪修院，Apple教主喬布斯，就曾經喺呢家禪修院學佛，禪宗就從中影響咗IT界嘅發展。

Apple產品充滿「禪」味

喬布斯曾經喺印度禪修，鈴木俊隆後來仲成為佢嘅師傅，就啟發到佢將「禪」崇尚簡約主義嘅元素，融入Apple嘅產品，其中最具代表性就係iPod。

今次「潮爆方丈」拜訪Apple總部，就同庫克交流對學佛同科技產品嘅心得，方丈仲大讚用科技產品溝通，減少走動時間，從而減少空氣污染，於是庫克問番方丈轉頭，「少林寺係咪有WiFi上網？」

方丈仲話遲啲就會覆蓋晒成個少林寺，遲吓仲打算用iTunes嚟授課，睇怕庫克都應該識做，會送番一百幾十部iPhone、iPad畀少林寺嘅和尚，用嚟上堂時用啦。咪當做添香油囉！

余絲韻