保曼上月卸任做咗14年嘅微軟行政總裁（CEO）一職之後意興闌珊，絲絲尋日本來想同佢講聲「58歲生日快樂」，依家似乎祝佢「搵番頭好人家」啱聽啲。
佢日前接受訪問時就坦言，做董事同CEO感覺好唔同，好似今個月十號同十一號嘅董事會議，自己成個人都靜咗好多，仲話：「我冇好似以前做行政總裁咁講嘢。」
其實佢當時選擇留喺董事會，已惹嚟分析員同潛在繼任人閒言閒語。今次佢親身話唔知會留喺董事會幾耐，去留取決於自己對餘生嘅睇法，同埋過去6個月點樣設法避免畀人當廢人（Lame Duck）。
保曼向來叫微軟做親生仔，要瀟灑離開同骨肉分離又談何容易？話晒佢手上嗰4%股份值130億美元，係緊隨創辦人蓋茨之後嘅第二大股東，日後唔通只能做個「沉默」的股東？
不過保曼個人唔Hea得，又唔鍾意過啲得閒打吓Golf嘅生活，之前喺牛津大學分享時就話會花時間諗諗「要試啲自己有熱誠嘅新嘢」。佢効力微軟逾33年，算係第一次有機會休息諗下一步點行。
保曼上年九月曾承諾為iPad開發Office軟件，後來微軟又表示要拉開自家品牌同對手喺市場上距離，外界推測係微軟眼見Windows平板有起色，所以要先保護自家產品，不過現任行政總裁納德拉將於本周四宣布推出iPad版Office軟件，保曼大讚納德拉工作做得好好。
余絲韻