絲絲聽江湖傳聞，巴克萊因為一子錯，冇得參加阿里巴巴上市嘅盛宴，損失數以億美元計嘅承銷佣金。
究竟巴克萊得罪何方高人？原來就係同馬雲拍住搵食，亦係阿里主要股東之一嘅軟銀老細孫正義，呢段恩怨要數到上年軟銀嘅一單巨資收購，孫正義當時睇中咗美國第三大營運商Sprint，點知半路殺出另一個對手Dish，教路者就係巴克萊董事長Charlie Ergen，搞到軟銀最後要加價7.5%，用咗216億美金先至將Dish擊退。
使多咗咁多錢，軟銀創始人孫正義梗係嬲到爆，佢即刻打畀阿里主席馬雲大吐苦水，要求封殺巴克萊，叫阿里唔好問佢借錢之餘，更力阻阿里搵巴克萊做上市保薦人。
孫正義對巴克萊嘅報復真係唔講得笑呀，多家大行入晒席等開飯，巴克萊就冇得入席，損失真係大囉。
巴克萊今次落錯注真係賠了夫人又折兵，聽聞佢哋知衰，即刻轉由阿里嘅對手騰訊（00700）入手，無論係騰訊入股京東商城，定係京東商城IPO嘅過程，都可以睇到巴克萊嘅身影。
余絲韻