喺電影《華爾街狼人》最後一幕，出獄後洗盡鉛華嘅男主角轉咗行做勵志講師，拎起支筆要台下學生「Sell me the pen」，用當年訓練豬朋狗友推銷垃圾股票嘅方法，傳授銷售技巧，帶出做Sales要了解對方需要、製造迫切性嘅道理。
現實中嘅「華爾街狼人」喬丹‧貝爾福特（Jordan Belfort）確實係一名教Sales搵食嘅勵志講師，日前佢接受訪問時，不忘推銷自己教緊嗰套叫「Straight Line」、淨係網上「補課」都盛惠2,316蚊嘅推銷技巧，提到語調係語言產生影響力嘅秘密，能夠主導對話，而且要學前總統克林頓咁，做一個主動嘅聆聽者，千祈唔好講廢話。
不過，今時今日嘅狼人更加強調發財立品，話營銷倚仗嘅係「道德嘅游說技巧」，斷言「冇道德嘅成功叫失敗」！佢直認自己犯法，抵坐監，每當其他人問佢「點解你可以啪咁多丸」、「點解會咁」嗰陣，內心會好唔舒服。
諗番喺戲入面，發錢寒到出汁嘅佢，用電話傾生意嗰陣拎住個聽筒一路奸笑，一路對個客做粗口手勢個樣，真係令人有滄海桑田嘅感覺。
之但係，咁唔代表佢嘅生活變得好平民，事關貝爾福特依家喺加州曼哈頓海灘住緊間4,000平方呎、坐擁大海景嘅豪宅，而且有個未婚妻。
余絲韻