尋日絲絲見到周大福（01929）董事總經理黃紹基（Kent），佢慨嘆依家內地嘅口味轉得好快，所以喺內地做生意最緊要應變快。佢舉例話，早排佢哋嘅日月星辰同埋六字真言呢兩隻金飾珠仔產品無啦啦爆紅，好多人排住隊等買，賣到斷晒貨。
佢哋開頭都抓爆頭唔知咩原因，因為呢兩個產品已經出咗2、3年，後來先搵到原因。原來內地有人講話呢幾粒珠仔可幫助轉運喎，訊息喺網上快速傳開，加上單價只係幾百蚊，搞到個個都爭崩頭咁話。
Kent話，到依家中港都冇得賣，要訂貨先有，仲有帶動埋二次創作嘅生意，好似手繩咁。
講開又講，今年係周大福成立85周年嘅大日子，佢話嚟緊會有一連串慶祝活動，當然又係銷售推廣嘅好時機。不過佢話講到有意義嘅里程碑會係二○一五年，因為周大福將會係米蘭世博中國館嘅合作夥伴之一，亦都係唯一一間珠寶商入選，究竟有幾巴閉？
Kent話單係賣紀念幣已經商機無限，而且周大福可以喺館入面搞一場活動，仲有第三樣秘密武器就要賣個關子啦，不過佢話包保到時大家一定會嘩嘩聲喎！咁絲絲一於拭目以待喇。
余絲韻