蘋果公司（Apple Inc.）「教主」喬布斯離開咗我哋兩年幾，好多人對佢嘅敬佩並冇減退過。
德國劇作家奧澤（Roland Auzet）最近就將艾薩克森所寫嘅暢銷書《喬布斯傳》，同英國大文豪莎士比亞嘅劇作《亨利五世》（Henry V）大搞Crossover，寫咗套《喬布斯五世》（Steve V）向喬布斯致敬。
容許絲絲交代吓莎翁《亨利五世》嘅歷史背景先，話說呢位英格蘭國王一直希望征服法國，喺1415年率領英軍進攻。英軍開頭輸到要議和，但畀法國拒絕，雙方惟有決戰，卒之亨利五世喺「阿金庫爾戰役」憑機智擊敗人數多自己幾倍嘅法軍，扭轉劣勢，造就幾年後成功征服諾曼第。
講到呢度可能大家已經聯想到，蘋果公司喺喬布斯領導下推出iPhone同iPad，開始咗智能產品大行其道嘅日子，改寫市場同我哋嘅生活。奧澤話，《喬布斯五世》正係要展現喬布斯同亨利五世一樣，憑創新改變現實嘅精神。
話晒喬布斯係現代人，《喬布斯五世》表演形式上充滿現代風格，將古典歌劇、詩歌同Rap共冶一爐。套劇會喺今日至下星期二期間，喺里昂文藝復興大劇院上演四場，作為今年法國里昂藝術節嘅一部分。
余絲韻