Market Insight：市底仍弱增持現金

昨日午市幾個內地數據公布後，魚缸最後一個好友都再頂唔順，若非A股應跌唔跌仲要升1%收市，斷估恒指跌幅唔止145點咁簡單。恒指收報21,756點，主板成交691億元，個市弱過藥煲，最好增持現金。騰訊（00700）終於失守六百關，跌2.3%收報588元，唔少當炒股都隊得幾誇張。

獲阿里巴巴入股，周三高開低收殺盡散戶的文化中國傳播（01060），再隊低11.4%收報1.62元，前日唔好彩3.39元高位衝入去如果仲未逃生，帳面經已輸超過五成，同去賭場無乜分別。

古勝冇點你 2014/03/14

萬里長空

碧桂園（02007）去年業績對辦，盈利升24.2%至85.1億元人仔，勝預期，瑞銀估計今年主攻三線城市平均呎價有一定壓力，目標價由6.63元減到去4.47元，昨由頭隊到尾，跌10.5%收報3.56元。

概念狂熱前車可鑑

文化中國投機味高於一切，不贅。話說回頭，閣下如果係騰訊及阿里掌舵人，股市及私幕基金陷入半瘋狂，畀六七十倍PE買你公司印的公仔紙（私募基金的非上市股份最新報價，阿里整體價值升到1,500億美金），你會點做？講到底，最好趁極高股份溢價，直接出去買earning（盈利）番嚟壯大自己份成績表，就算畀到三四十倍PE，除笨有精，計落攤薄每股盈利都仲有着數，實行玩到爆為止。

到最後，「雙馬」得唔得閒逐個湊大買番嚟的養子？無疑是喜歡衝着「雙馬」概念去豪賭的股民，務必要考慮的關鍵。見過當年紅籌及二○○○年科網熱，老實講，有閒錢兼有心理準備隨時total loss仲可以諗吓，賭大錢真係咪搞。

地產股平貨冇人吼

大埔白石角地皮，在七間地產公司包括幾間本地主要發展商都有份入標下，最後達唔到政府心目中的底價流標收場。基於特區政府首要任務是調理高價樓問題，一方面話增加土儲供應，提升未來建屋量，一方面又出現唔到價流標，都真係幾令人意外。當然，都唔夠坊間吹風，話最高標書出價29億元，樓面呎價不足4,000元，比○九年比鄰地皮低45%咁驚嚇。

毫無疑問，雙辣招下去年大發展商賣樓進度受阻，短期亦唔怕無貨買，對補充土儲的胃口自然減少。加上比鄰信置（00083）的新盤去貨唔算太理想，都影響其他發展商踩隻腳入白石角的信心。美銀美林報告話，今次流標對信置影響相對較大，亦都維持今年樓價跌一成，明年再跌一成至一成五的悲觀預測。

恒生地產分類指數成分股，市帳率約0.7倍，多少可見股市有晒心理準備，樓價要跌。睇番過去二十年，市帳率低於0.7倍樓下（最低是九八年亞洲金融風暴的0.63倍）的，除今次外，仲有九八年、○三年沙士及○七年次按風暴。

除非內地經濟及政治局勢急轉直下，古勝相信地產股充分反映美國退市，利息上升的不利因素。可惜是，政府已擺出樓市唔跌，雙辣不撤姿態，就算地產股股價已經好平，對於基金經理而言，都係無充分理據，此時此刻真金白銀入市吸納。

破壞容易要復原難

跌市搵超跌股話都冇咁易。因為周初內地一個負面報道，蠟筆小新食品（01262）股價由周二高位5.93元急挫，雖然周三公司發出澄清公告，但仍未能穩住股價，昨日已是連續第三支大陰燭，股價曾低見2.76元，累跌幅度達53.5%，蒸發了自去年初以來的升幅，充分說明「建設難而破壞易」是甚麼一回事！

翻查資料，目前大股東鄭育龍持股63.7%，照計仲有增持空間，眼見股價大跌，大可以入場增持穩定人心。公司慣常在三月下旬宣布末期業績，此前大股東可能未能入場買賣公司股份，係咪有基金睇準呢一點玩嘢，不得而知。

但公司股份一直維持交易，亦有合資格會計師審核帳目，若然公司營運正常，相信股價終有一天會作出修正，言則眼前笨豬跳有可能係執平貨良機，只是呢類風險操作係膽博膽，唔想冒險就惟有坐定定等睇戲！

古勝