世事常變，上市公司明明講好咗會搞業績記者會，臨時臨急又取消，畀佢玩謝！
物美商業（01025）早兩日至溫馨提示大家，記招時間同地點，點知尋日突然喺收市前發出通知，話今年全年業績記招取消，原因係管理層行程臨時有變。
睇嚟物美管理層呢排真係突然好忙咁喎！咁又係嘅，上星期物美大股東折讓45%提出全購嗰單刁，可能增加咗唔少物美管理層嘅工作量嘞。
不過，絲絲聽聞公司照搞分析員會議喎，物美公關惟有解釋管理層Schedule真係好密，亦深感抱歉咁話。其實記者同分析員都重要，究竟佢哋取捨理據係乜，絲絲好想知。
物美總裁兼執董徐瑩對上一次公開露面，已經係舊年同卜蜂蓮花（00121）傾戰略合作一事，雖然雙方交易告吹，連同上達資本入股物美亦失效，但好彩仲有母公司撐住，相信物美管理層下次有機會講業務進展，都儲埋唔少感想可以一次過分享。
余絲韻