絲絲講場：基金搵故人美聯有排煩
美聯（01200）呢排正值多事之秋，繼兵變事件後，持有美聯7.31%嘅基金Apex Benchmark，忽然搵咗美聯創辦人之一嘅馮銳森做Apex策略顧問。馮銳森喺二○○○年同主席黃建業意見不合而離開，睇Apex呢次嘅布局，好戲在後頭，美聯管理層有排煩。
策略顧問畀正面意見
Apex基金代表繆宏邦（Bondy）同絲絲講，一直以來持有美聯作長線投資，係因為睇好呢間公司未來發展，參考國外經驗，唔少主導型基金公司會提供意見改善目標公司嘅運作。
所以今次就邀請到業界老行尊馮生加入，一來佢係美聯創辦人之一，二來佢當年培訓唔少地產代理，包括自己初入行，亦係跟佢學做工商舖代理，以佢嘅資歷，可以為美聯畀啲正面意見。Bondy又話，基金仍持有美聯7.31%股權，未來唔會減持，反而有機會增持，但要視乎股價。
上個月有傳媒引述Bondy，公開斥責美聯經常有人事變動，又話公司業績欠佳，或者會賣晒手頭上美聯股份。不過最終一股都冇賣到，反而搵馮銳森做策略顧問。
馮銳森當年做副主席
馮銳森喺一九七○年代，同黃建業一齊創辦美聯物業，九五年美聯集團上市時，馮銳森就做副主席兼董事總經理。不過，佢喺○○年離開美聯，同其他美聯「舊將」成立必富利，專做商業物業代理。
今次馮銳森可能拍住Apex同美聯對着幹，有趣嘅係，馮銳森嘅胞弟馮銳彬，今個月初就透過持有嘅荷蘭Fulusco公司，同美聯嘅附屬公司簽訂合作協議，大家互相介紹客人畀對方，馮氏兄弟真係各有所長。
余絲韻