孖妹S檔案：理財姊妹淘8大貼士

1 買公用股升息俱備

敦沛期貨董事總經理劉艷玲：女人要趁後生開始儲「私房錢」，千祈唔好短炒，要正正經經諗長線。我向來喜愛買入公用股，有息收又有升值潛力，諗番十年前冇獲利沽售的話，我依家應賺唔少！其實我有幾種方法去儲「私己」，退休用的主要是大額定息存款，年息約有四、五厘。另剛買入60期的保守基金，主要投資在亞洲地區，預計五年後連本帶利約有100萬元，加上我有物業收租。所以我唔使老公錢，自己養自己，間唔中仲會請朋友、同事食飯，好似上周抽中幾手保利文化（03636），賺咗幾千蚊後都立刻與同事「食咗佢」。

高妹評價：若我在數年前買入騰訊（00700），毋須等十年已可發達。但價值投資始終可取，投資要諗長線，正如偶像巴菲特所說「若不打算持有十年，則十分鐘也不要持有」！

康宏 梁子琪

鴻昇 陳蓓敏

2 三成人工轉「不動產」

康宏資產管理聯席董事梁子琪：起碼要有兩個銀行戶口。每逢出糧，我會先把人工的三成轉至另一個戶口儲起。為免亂使錢我仲剪埋張提款卡，冇得攞兼冇得使，名副其實是「不動產」。至於另外七成人工，因我支出唔多，平時又少買包包，寧願儲多啲錢去做投資賺回報仲划算。

新鴻基金融 李惠嫻	金利豐 關萱慧	英皇 陳藝文

彩兒評價：我都有轉錢到第二個戶口，但有時轉季買衫或同朋友食飯out咗budget（預算），最終又使番該戶口嘅錢。但你咁狠剪埋張卡，抵你儲到錢，睇嚟我要效法吓！

3 風險傾向要跟年齡

鴻昇證券資產管理部董事總經理陳蓓敏：買股票最重要有計劃，在制訂投資策略時，要諗年齡、市況及預算。32歲樓下的女士可承受高風險，及後要減低風險承受程度，40歲以上要把風險降至最低。至於市況，我睇好港股的中長線走勢，因上次大跌市已是六年前，差不多是一個經濟周期的循環，故我預料第二季會有調整，已預留資金入市，當中較看好估值偏低的化工股。

御峰理財 香敏華

法興 蔡秀虹

高妹評價：我哋常在「魚缸」打滾，試過聽消息後衝動入市，受過不少教訓。依家買股票會有planning，唔敢亂嚟啦。

4 做定存要揀唔同期

新鴻基金融高級證券分析員李惠嫻：講到儲錢，必定會諗起做定期賺息，但卻驚會鎖住舊錢，尤其我嚟緊搞結婚，資金一定唔可以鎖死，故會選擇做不同期限的存款。以十萬元為例，先把五萬元做三年，再把三萬元做一年，剩餘的可選數個月便已到期，相較靈活。

彩兒評價：阿媽教落嘅傳統儲錢智慧就係做定期，可惜近年低息，令定期存款「冇乜肉食」，惟對一些「唔蝕得」嘅人依然適合，但最好首先比較銀行利率。

5 月供ETF啱懶人投資

金利豐金融高級研究分析員關萱慧：想儲得快，投資固然係捷徑，但對忙到無時停的職業女性而言，邊有時間睇市？不妨做最啱懶人的月供ETF（交易所買賣基金），盈富（02800）係穩陣之選，追蹤恒指博長線升值之餘，亦有息收，況且買入恒指即買入一籃子成分股，本已分散風險，對一些不諳投資或唔得閒睇市的人至為適合。另月供ETF的話，每月僅畀一、二千蚊，唔覺唔覺就儲到錢，但一定要預長揸。

高妹評價：我日日睇住個市，反會容易受影響做錯決定，有時做吓懶人月供ETF都幾好，仲可趁機逼自己儲錢。

6 用網購Coupon執平貨

英皇金業營業部副總裁陳藝文：有時可諗吓慳錢計仔，尤其近年興網購，不時可在淘寶網執到平貨，就好似花果茶僅十幾蚊人民幣一包，但在香港超市賣近百元，計埋匯價都平好多。不過，講到最抵，是吼節日購物優惠。剛過去的三‧八婦女節，阿里巴巴集團便推出「手機淘寶3.8生活節」，我哋返內地唱K、睇戲只需3.8元人民幣咋。騰訊亦搞促銷，如有「十萬瓶麻油一元秒購優惠」，簡直抵到爛！另我經常到內地出差，可順便在內地取貨慳運費。

彩兒評價：在淘寶購物的確好抵，但曾試過為慳運費而買嘢湊數，結果該月足不出戶卻用多咗錢，所以最好只善用購物優惠買入必需品。

7 生活從簡 慳得就慳

御峰理財資產管理及研究部投資組合經理香敏華：在香港生活可平可貴，不妨從生活細節上出發。我主張簡單生活，如放假會去郊外行山，而不是行街買衫，加上我鍾意煮嘢食，放工後會返屋企煮飯，儘管食材愈來愈貴，但已較出街食飯平好多。另平時亦較少搭的士，多數會搭巴士或地鐵以節省交通費。雖然這些看似微不足道，但小數怕長計，每月減少一至兩成支出，整年計便可儲下可觀的「私己錢」。

高妹評價：好多家庭主婦冇收入，都係靠買餸「打斧頭」，睇嚟你有潛質做精明嘅靚師奶，哈哈！

8 每月Mark數減購物欲

法興證券衍生工具部副總裁蔡秀虹：女性有好多花費，部分更是情緒化支出，故我會記錄主要支出，可了解消費習慣之餘，亦能審視其必要性，有助減低購物的衝動。由於女士貪靚，主要支出總離不開衣着打扮，我亦不例外，但會睇需要，費事買咗唔着仲浪費。

彩兒評價：冇錯，女人開心會Shopping，不開心更會Shopping！我經常受唔住誘惑買入「唔等使」的東西，擺喺屋企阻地方得嚟仲好嘥錢。聽你咁講，等我去下載個理財App記數，冀有警惕作用啦。

高妹 彩兒

若有料報畀高妹同彩兒或有嘢問，可電郵money.biz@opg.com.hk