英超球隊、紅魔鬼曼聯今季敗仗連連，喺聯賽積分榜跌到第七，令「紅魔」不少擁躉失望。之不過，部分投機者已部署趁機發財。英國《每日電訊報》引述研究機構Markit數據指，目前曼聯空倉佔全部股份1.97%，比率創紀錄新高，以曼聯19.25%嘅流通股份計算，超過10%股民押注曼聯翻身無望。
絲絲理解投資者看淡曼聯，原因不外乎球隊近期戰績欠佳，萬一今季最終入唔到英超Big Four，未能躋身下季歐洲賽事，轉播費及獎金等豐厚收入「泡湯」，會拖累業績大倒退。事實上，曼聯股價周三收報15.19美元，較去年五月中紀錄高位19.18美元反覆累挫20.8%，上月中仲跌過落14.26美元，幾乎跌穿14美元嘅招股價。
之不過，紅魔鬼又唔使「斯人獨憔悴」嘅！轉個鏡頭，同病相憐嘅仲有昔日喺意甲同樣呼風喚雨嘅AC米蘭，據彭博社引述知情人士透露，呢隊由意大利前總理貝魯斯干尼出任班主長達廿八年嘅褪色班霸，正尋求放盤，已委任投行Lazard物色買家。
不過貝氏嘅投資公司Fininvest就否認放售呢家畀財經雜誌《福布斯》估值9.45億美元嘅球會。目前AC米蘭喺意甲排名只有第十，同曼聯一樣岌岌可危。
余絲韻