絲絲講場：新地郭炳江與眾「童」樂
新鴻基地產（00016）成日都贊助唔同機構活動，不過估唔到由香港藝術節主辦、新地贊助嘅「創藝童樂樂」，新地主席郭炳江竟然親自出席，為一班小學生打氣，望住佢哋吹牧童笛仲笑笑口聽得好開心咁添。
推廣多元藝術文化
話說呢個「創藝童樂樂」計劃，畀來自舊區學校或基層家庭嘅兒童體驗多元藝術文化。由去年第一屆推行到依家，受惠小學生已超過3,500人。「創藝童樂樂」學生展演喺新地旗下天際100香港觀景台舉行，又有靚景又有大班得意可愛嘅小朋友表演音樂、舞蹈，場面樂也融融。
喺學生表演上，參與舞蹈工作坊嘅小朋友將日常生活融入舞蹈當中，着上色彩斑斕嘅舞衣展現自創嘅舞蹈，而完成音樂工作坊嘅小朋友就運用唔同類型嘅牧童笛合奏活潑動人嘅旋律。一向係大忙人嘅郭生除咗為表演兒童打氣同頒發證書，仲同佢哋一齊將音符貼喺大型五線譜上，象徵新地同香港藝術節合力畀小朋友體驗多元藝術文化。
郭生欣賞小學生吹牧童笛嘅時候全神貫注、面露歡顏，唔知係咪勾起咗佢嘅童年回憶呢？相信好多朋友小學嘅時候上音樂堂都有吹過牧童笛，絲絲自己都唔例外，都稱得上係港人嘅集體回憶。
余絲韻