絲絲講場：微軟買Nokia蓋茨唔Buy
微軟斥資達72億美元（約562億港元）對諾基亞智能手機部門嘅收購計劃將會喺本月完成，但彭博社近日發表嘅一篇文章就大爆內幕消息。
當日一次董事會議中，其實創辦人蓋茨、現任微軟CEO納德拉（Satya Nadella）、Skype前舵手貝茨（Tony Bates），同幾位董事會成員一樣，一開始都反對微軟收購諾基亞嘅設備同服務部門，即係智能手機業務。對於今日諾基亞快將成為微軟旗下品牌手機，呢個消息連絲絲都嚇一驚。
保曼為單「刁」威脅辭職
彭博社仲講話，當時對於收購諾基亞智能手機嘅討論都幾激烈吓，仲搞到前微軟CEO保曼揚言，如果董事會唔贊成佢嘅決定，佢就唔做微軟CEO。後來，納德拉似乎改變主意，以電子郵件嘅形式，向彭博社發出聲明，話呢場收購係微軟一個正確嘅行動。但即使納德拉最後轉軚支持保曼，收購諾基亞智能手機部門，但蓋茨依然堅決反對呢場交易。
「軟硬」之爭考起納德拉
有關微軟前領導層對收購出現分歧嘅消息，聽聞係喺微軟日前宣布貝茨離職後曝光嘅。至於保曼最後都宣布退休無做CEO，但就依然留喺董事會。
依家個收購計劃都搞得七七八八，但絲絲對於諾基亞嘅未來就仲係好有保留，雖然就話佢畀微軟收購咗，幫到佢起死回生啫，但原來個收購計劃喺微軟嘅支持度係咁低，未來嘅發展就真係要睇你信保曼嘅眼光，定係信蓋茨同一眾董事喇。
而新CEO納德拉雖然執個吓公司嘅管治團隊，但點樣喺保曼同蓋茨等董事之間化解微軟呢場「軟硬」發展之爭（軟件和硬件），就要考佢嘅工夫喇！
余絲韻