Market Insight：光伏股升勢持續

古勝可以預計，下月十八、十九日議息日（期間仲有一次二月就業數據），聯儲局勢必就退市指引作出修訂，期間鷹鴿兩派亦必會就加速退市抑或重訂退市與失業率掛鈎目標而交鋒，股市就最唔鍾意估估吓，在如此氣氛底下加埋個雙頂，真係唔多箋 。

一葉知秋，先前港匯早於港股見底反彈，在下估新興市場撤資潮可能告一段落，結果個市亦不負所望，由21,197點彈番去上周四高位22,742點，但相比尚有濠賭股及騰訊（00700）托住的恒指，國指就確實唔爭氣，只由低位反彈5.4%，動力不及恒指的6.4%。上星期五恒指反彈174點收市，國指居然逆市跌41點，率先跌穿10日線，走勢認真麻麻。

古勝冇點你2014/02/24

萬里長空

內地數據唔爭氣

另一現象是近期見人民幣單邊升值形勢有變，上周三、四、五仲要回得幾急，兌美元跌至6.0912，距一月中的匯改後高位6.0393累積貶值0.085%，並把去年十二月開始的升幅一鋪清袋。

有人認為係人行唔希望見人仔單邊升值的無形之手作祟，但近期內地經濟數據又真係爭唔落，滙豐編制二月製造業PMI初值跌至48.3，新訂單半年來首次跌穿50盛衰分界線，內地經濟猶如被霧霾籠罩，殊不明朗。展望官方二月製造業PMI，將於三月初曝光，暫見大行預測數字會由一月的50.5跌至50.1，今個星期加埋期指結算，如果大孖沙避險，喺數據公布前沽番轉頭，應該唔會令人太意外。

今日焦點一定係收市後大笨象滙控（00005）份成績表，綜合大行平均預測賺171.65億美元，但重點應該係滙控派息會唔會闊佬番啲，大行都估緊末期息會由去年18美仙增加至20至24美仙。

對滙控又愛又恨

曾經係港人至愛的滙控，○九年海嘯低位反彈之後，近幾年令唔少人失望，一三年更係困守在十幾蚊內上落，在76至90元之間打回力球，只有間中在長短倉基金做套戥活動或者有衍生工具發行時，先至有番啲睇頭。但計埋股息，舊年滙控先至勉強有3%回報，相對同期美國銀行股iShare，或者歐洲銀行股iShare EURO STOXX，回報分別有25.1%及30.9%，一眾大笨象捧場客難免咬牙切齒，對佢真係又愛又恨。

坊間對滙控一四年股息預測有5.1厘，睇落OK，但如果結合美國退市，近大半年公司債券孳息普遍見底回升，加埋未來兩三年，滙控top line（收入）增長展望一般，又有啲雞肋味道。如果認定新興市場否極泰來，首選應該係渣打集團（02888），如果認為歐洲、美洲銀行生意有運行，芬佬又未必揀香港佔收入最大部分的滙控。定位上的尷尬，多少係滙控股價膠着的主要原因。

協鑫可挑戰高位

距離內地兩會下月會期愈來愈近，上周環保及新能源股表現較硬淨，不排除未來兩周會提前炒一轉。光伏股中，保利協鑫（03800）上周五股價起動，升半成收報2.8元，乃上月下旬以來收市高位，14日RSI動力增強，若本周初升勢持續，有勢反覆向上挑戰五十二周高位3.02元。

風電股方面，過去一年，內地風電行業已由「逆風」轉為「順風」，今年「順風」的動力好大機會在國策推動下進一步增強。中國風電（00182）在上月初發盈喜，預期去年度純利將按年大幅增加，主要受惠風電和光伏電廠所產生的發電量及EPC收入增加。上周五，其股價以全日高位0.72元收市，升幅半成，短線若確認升穿由上月高位0.84元所延伸的降軌阻力，料股價可再向高位進發，支持位在0.65元。

古勝