絲絲講場：翠華巨舖擁抱殖民時代
翠華（01314）上個月以過百萬月租，頂手名人飯堂富臨飯店阿一鮑魚喺銅鑼灣駱克道8,000呎巨舖，令市場震驚，主席李遠康尋日就話，四層高嘅旗艦店係地標式戰略據點，四月中就會開張，Sell歐洲馬戲式主題，仲話有英國殖民地色彩，絲絲就好期待喇，唔知要賣幾個多奶油豬先夠圍皮呢？
李遠康解釋，由於佢哋簽咗達十年以上租期，所以租金有得傾，但都話係以市價承租。佢仲極力Sell話個地理位置好正，對正地鐵站，笑言慳番唔少廣告費喎。不過絲絲最好奇都係歐洲馬戲式主題兼夾英國殖民地色彩，呢個Concept唔知食客又Buy唔Buy呢？
新餐牌唔會「將貨就價」
曾經話過希望同股東一生一世，但上月管理層減持，李遠康解畫話自己都係割愛，但因為太多投資者想買多啲公司股票，又考慮到流通量，所以先有此舉。
佢仲話公司四月會有新餐牌，價格會有調整，但強調會維持「性價比」，唔會將貨就價喎，咁咪即係直接轉嫁畀消費者囉。公司一三/一四財年下半年嘅同店銷售符合預期，每單消費略有提升，香港提升至74至77元，內地則190至200元。
余絲韻