呢兩日好多自認係I.T.界嘅人，都慨嘆點解唔係生於WhatsApp呢？一個交易，每個員工袋4.2億元。創投基金紅杉資本亦都賺到四萬咁口，但勢估唔到，原來N年前紅杉（Sequoia Capital） 曾經想注資入facebook（fb），朱克伯格竟然着條睡褲見人，擺明唔想要啲錢。點知今次交易紅杉賺返fb一大筆，所以話呢，係你嘅就係你嘅。
WhatsApp創辦人科烏姆先排至話唔會賣，點知朱仔用咗短短個幾星期時間，就冧掂佢合併，單刁成1,482億元。
十年前朱仔創立fb嗰陣，莫講話立志靠佢發達，直頭冇諗過長搞，反而睇好搞緊嘅另一個社交網站Wirehog。但紅杉又好識貨，想注資入fb。不過，fb另一位創辦人帕克當年搞社交網站Plaxo得過紅杉注資，但後來慘被人踢出董事局，帕克懷疑係紅杉有份興風作浪。殷鑑不遠，朱仔於是唔想收紅杉嘅錢。
喺朱仔要見紅杉當日，朝早八點嘅會佢唔止遲到，仲着住睡褲現身，兼整咗個題為「唔好投資十大理由」嘅簡報，數臭fb冇收入、實畀樂壇告、自己遲到兼着睡褲、帕克都有份搞、仲型到話「我出席只係因為你哋一個合夥人叫我嚟」！
朱仔幾年後接受《facebook效應》作者採訪，都承認為當年嘅胡作非為愧疚。堂堂創投基金聽到咁嘅Present有咩感受，相信唔難理解，紅杉多年來都冇染指朱仔嘅事業。紅杉三年前注資WhatsApp，喺今次併購案度賺到笑，面同錢都賺晒，過去嘅恩怨，用錢解決咗啦！
余絲韻