絲絲講場：陳爽講業務如數家珍
光大控股（00165）首席執行官陳爽原來記性極好，話說佢同絲絲傾開業務重點，唔使睇貓紙，又唔使人提，一口氣講晒公司業務，數字都好清楚。連公司投資咗嗰80幾間公司嘅名稱，絕大部分都記得，令絲絲好佩服。
陳總話今年會係豐收年，佢哋過往投資嘅公司，有12間排緊隊等上市，就算今年上唔切都可以遞交上市申請表，既有A股亦有H股。佢話，公司嘅策略係「邊退邊買」，即係一面退出舊有項目，一面投啲新項目，投資咗80幾間公司中，光控已經退出咗20幾間。
佩服同系陳小平能幹
陳總何解會記得晒啲公司名？佢就笑笑口話，其實都係因為早期公司團隊未夠成熟，自己參與喺當中，同團體一齊落手落腳去睇點樣投資同埋搞好投資咗嘅業務，所以記得咁深。佢哋投資嘅公司，絕大部分有好回報，佢嘅信念係「沒有差嘅行業，只有差嘅產品」，只要公司團隊質素好，就砌到好嘅產品，所以佢慶幸擁有高質素嘅團隊。
數數下手指，陳總已經效力光大十幾年，佢話13年前嚟香港幫光大集團處理不良資產時，就同依家光大國際（00257）行政總裁陳小平合作，搞掂後兩個人就分別喺光控同光國做，佢話好佩服陳小平嘅能幹，仲希望陳小平屆退休年齡後可以繼續留任光國。