絲絲講場：黃建業贈「戰衣」寓意深
呢排天寒地凍，絲絲只想同張羽絨被做人世，眼見唔少地產代理為咗做好盤生意，晨早凍冰冰拉客，好辛苦o架。美聯集團（01200）主席黃建業好識做，親自挑選「黃金戰衣」，送畀住宅部行政總裁布少明，收到呢份獎品，布少明真係暖到入心。
伙記忙於打新盤大戰
黃建業早已講過今年樓市係「一手天下」，果然新盤大戰日日爆發，一班手足真係馬不停蹄，搶奪市佔率，紮職冇耐嘅布少明，同埋各區統帥，喺冷鋒下奔赴各區調兵遣將。
黃建業呢位老細點會唔知佢哋辛苦吖，於是親自挑選「黃金戰衣」相贈，希望為勞苦功高嘅將領抗禦澟洌寒風。
「Brooks Brothers」象徵團結
佢揀嘅戰衣原來都好有意思o架，布少明獲贈嘅「戰衣」出自西裝品牌Brooks Brothers，目的係體現「We are all brothers and sisters （親如兄弟姊妹）」嘅團結精神。
黃建業仲話，呢隻牌子向有「總統御衣」嘅美譽，美國歷屆總統都有着，現任總統奧巴馬就職當日亦身穿呢個品牌嘅服裝和佩飾。黃主席原來係希望布少明穿上「戰衣」後，可以好似奧巴馬咁帶來連串「改革」。
據聞今次係黃主席第一次送衫，之前送過Hermes呔畀包括布少明在內嘅高層。
余絲韻