Market Insight：醫藥股輪流落鑊

真係唔到你唔信邪，昨日港股早段係威係勢，將一月下旬跌市，22,659至22,722點的最後一個下跌裂口都補埋，之後滙豐中國製造業PMI一出，恒指即高台跳水，埋單插低270點收報22,394點，高低位來回445點之多。講番滙豐中國製造業PMI，由一月49.5滑落至二月48.3，創七月低位，兼低過50盛衰分界，反映製造業緊縮中，自然唔係太好兆頭。

要留意數據取樣時間介乎本月十二至十八日（年十三至十九），即係調查啱啱過一月三十一日至二月六日的內地農曆年假期，但未過農曆十五，相信唔少中小民企員工未從鄉下回到工作崗位，睇埋最終修訂值出埋至見真章。

網絡巨擘四圍「濕平」唔係騰訊（00700）及阿里巴巴所專美，昨金融圈焦點係近日被指年輕用戶流失的facebook，斥資190億美元買入擁有4.5億活躍用戶的Whatsapp，相當於1,482億港元的收購價買下一間僅用了32個軟件工程師的「小公司」，而數人頭每個46.3億港元（舊年Instagram收購依人頭計值7.8億港元），facebook又創紀錄。

古勝冇點你

萬里長空

微信估值更勝一籌

昨日網上流傳一單舊聞，Whatsapp創辦人Brian Acton○九年放棄雅虎工作後，曾向facebook叩門搵工，朱克伯格當時唔「蘇」佢，其後自立門戶，先有「萬倍奉還」的故仔。

昨日即刻見到有人用190億美金換4.5億用戶，除開每個活躍用戶值42美元，套落擁有超過6億微信用戶的騰訊身上，咁計仲未賺錢的微信值252億美金或1,965億港元！經已有種二千年科網泡沫爆煲前，眼球、登入人數計價情況出現，聽落都驚。

隔晚聯儲局公開一月議息紀錄，有委員提出趁上月失業率落到6.6%，即將觸及上任伯南克跌到6.5%加息的指引作出調整。美國有幾大加息空間？古勝有保留，近期美債息兩度見3厘樓上都已頂住。

公司債多數無肉食

近排的確見唔少公司為加息周期做準備，大有山雨欲來之勢，尤其對資金需求較高的房產商。今個星期新世界（00017）及新地（00016）先後發債（七年期5.5厘及十年期3.75厘），昨日華潤置地（01109）加入伸手行列，一口氣推五年及十年期債，預計票息4.48厘及6.1厘。

再數遠啲，一月至今富力（02777）、合景泰富（01813）、奧園（03883）、世茂房地產（00813）、花樣年（01777）、禹洲（01628）及華南城（01668）已經先後伸手，幾近三日一債局面。公司債突然熱鬧起來，但同舊年五月之前形勢唔同，嗰陣私人銀行直頭建議客仔動用孖展認購，賭一開即升。

近期鑑於供應充裕，又唔係太多新錢留戀債市，新債開波多數無乜肉食。話說回頭，一堆內房發展商，一三年銷售熱爆仲不斷搶錢，多少反映內地拆息即使高位回番唔少，但水緊現象，尤其對於民企景況依然。

雖然指數回落，但在兩會行情力挺下，無損醫藥股板塊強勢，鳳凰醫療（01515）創上市以來新高14.48元，收升3.2%；康哲藥業（00867）及四環（00460）股價並駕齊驅，同創新高；上海醫藥（02607）亦發力追落後，收報19.86元，升4.6%。在下周五收市後獲納入MSCI中國指數成分股的石藥集團（01093）亦創新高6.94元，相信指數基金尚要追貨，7元關不日可攻破！

麗醫不妨分注收集

較少人留意仲有隻B轉H的麗珠醫藥（01513），昨日股價亦曾高見60.5元，收報59.8元，跌0.2%。本月以來由46.9元起步升至新高61元，累升幅度達30%。估值方面，現價一四年度預測市盈率約23倍，公司積極調整產品結構，並加快併購，盈利前景可看好。且先觀察短線回吐在56至58元水平承接，守穩其上可考慮分注收集，近日中金的研究報告便將其目標價定在72元。

古勝