「基金教父」老婆轉行搓麵粉？成功男人背後總有個默默支持佢嘅女人，交銀施羅德投資管理（香港）副董事長雷賢達當然唔例外，不過向來照顧得屋企好周到嘅雷太近年要轉行做藝術家，今次輪都輪到雷生為太太打氣喇。
話說麵粉花手工藝曾經喺香港好盛行，雷太講笑話細個冇心機讀書，用好多時間去畫畫，結咗婚之後就冇做護士，一直全職做家庭主婦相夫教子，擺低咗少女時代嘅藝術夢，到咗七年前姪女由外國返香港度假，雷太喺安排節目嗰時諗起不如一齊用麵粉花做手工藝，搓下搓下就搵番對藝術嗰份執着同追求出嚟，靠一對巧手仲搓埋成場麵粉藝術作品展覽嘅展品出嚟。
作品展以「十二生肖賀新春 百子同歡慶新禧」為主題，除咗有以唔同生肖為題嘅藝術品外，仲有一盤特別描繪出「百子」慶祝新年嘅盛況，每個人嘅面部表情都栩栩如生。
雷太話好享受製作過程，仲學識咗追求完美時要「捨得」，好似做花時如果仿真度有偏差就要放棄，雖然心痛都要從頭嚟過，但最開心嘅都係可以公諸同好。雷太仲話自己啲「手作仔」Size大，擺喺屋企用咗唔少位，好好彩有雷生容忍同支持。