科技界唔少呼風喚雨嘅大人物，例如蓋茨、喬布斯、「朱仔」朱克伯格都係少年成名，年紀細細就有一番成就嘅仲有佢—— 現年得18歲、研發新聞應用程式Summly嘅英國小子達洛伊西奧（Nick D'Aloisio），有指佢早前賣咗Summly畀雅虎後，將部分錢投資喺瑞典新興網店平台Tictail。
Summly真係名成利就o架，維港投資早幾年都有投資落去，所以好多人都對呢間公司另眼相看。
Tictail成立短短三年，依家用戶已經遍布全球110個國家，活躍網店超過3.5萬間，之所以咁受歡迎，係因為用家只需幾分鐘就可以喺Tictail開網上舖頭。據悉，Tictail最新一輪集資籌得800萬美金，投資者包括達洛伊西奧。
達洛伊西奧上年以估計3,000萬美金，將Summly賣畀雅虎，從中有1,000萬美元落袋。佢仲未回應投資Tictail嘅事，但年初接受《金融時報》嗰陣話未郁過筆錢，仲將喺雅虎逗嘅人工大部分儲喺銀行。
創立Tictail嘅行政總裁瓦爾德克蘭茲就確認咗達洛伊西奧注資嘅消息，話好高興公司前景備受睇好。其實瓦爾德克蘭茲都係少年創業家，19歲嗰陣開過設計公司Super Strikes，瑞典串流音樂網站Spotify都係客仔。